Tiniyak ni Pangulong Rodrigo Duterte na makikinig ito sa payo ni dating Pangulong Fidel Ramos ngunit may sarili siyang paraan para gumalaw sa isang sitwasyon.
Ito ang naging sagot ng Pangulo makaraang isapubliko ng Malacañang ang bahagi ng resignation letter ni FVR sa Pangulo bilang Special Envoy ng Pilipinas sa China.
Ayon kay Presidential Spokesman Ernesto Abella, tinanggap ng Pangulo ang pagbibitiw ni FVR at pinasalamatan ito sa mga tulong gayundin sa mga serbisyong ibinigay nito sa bansa sa kabila ng kaniyang edad.
Nakasaad sa liham ni Ramos sa Pangulo na may nagawa naman ang kanilang team kahit paano kayat naging mabunga at nabasag ang malamig na relasyon sa pagitan ng dalawang bansa.
Tiniyak din ni FVR sa Pangulo ang buong suporta nito para sa pambansang interes at sa mahigit 100 Milyong Pilipino na pinagsisilbihan nito.
By: Jaymark Dagala / Aileen Taliping
