Ilalabas ngayong araw ng DOLE o Department of Labor and Employment ang Department Order na nagbabawal sa mga commercial establishments na obligahin ang kanilang mga saleslady na magsuot ng high heels.
Kasunod ito ng panawagan ng ALU-TUCP o Associated Labor Unions-Trade Union Congress of the Philippines na ipatigil ang sapilitang pagpapasuot ng high heels sa trabaho lalo na sa mga kababaihan na nagsusuot nito.
Ayon kay DOLE Secretary Sylvestre Bello III, sa ilalim ng naturang kautusan ay malaya nang makapagsusuot ng flat shoes ang mga sales lady.
Sinabi pa ng kalihim na nakakaawa ang kalagayan ng mga manggagawa na nagsusuot ng matataas na takong dahil sa mahabang oras nilang pagtayo sa trabaho.
By Arianne Palma