Nagsalita na ang Australian Missionary nun na si Sister Patricia fox kaugnay sa pagkakabawi sa kanyang missionary visa at nag-aatas sa kanyang umalis ng bansa sa loob ng tatlumpung araw.
Ayon kay Sister Fox, nagulat at nalungkot siya dahil sana ay nabigyan siya ng pagkakataong maipaliwanag kung ano ba ang sadyang misyon niya o ang tinututukan nilang missionary work.
Sinabi ni Sister Fox na ito ang unang pagkakataon na naranasan niya ito sa loob ng dalawampu’t pitong taong pananatili niya sa bansa.
Ipinabatid naman ni Atty. Jobert Pahilga, abogado ni Fox na maghahain pa rin sila ng counter affidavit sa supplemental report ng Bureau of Immigration kung saan inaakusahan ang madre na lumalahok sa partisan political activity.
Sa tanong kung babalik pa siya ng Pilipinas, inihayag ni Sister Fox na mahirap nang ituloy ang kanyang missionary works kung tourist visa ang kaniyang hawak.
