Naniniwala ang pamilya ng 21-year-old na kadete ng Philippine National Police Academy (PNPA) na si Al-Rasheed Macadato na may kapabayaan sa panig ng pamunuan ng akademiya.
Ito ang dahilan kaya’t nasawi si Macadato matapos bumagsak sa kalagitnaan ng kaniyang pagsasanay sa Camp Heneral Castañeda sa Silang, Cavite nuong Mayo 15.
Ayon kay Engr. Rasahd Macadato, ama ni Al Rasheed, bagama’t heat stroke ang pinaniniwalaang ikinasawi ng kaniyang anak, nakalagay naman sa death certificate nito na multiple organ failure ang sanhi ng kaniyang kamatayan.
Hindi rin sila makapaniwala na dead on arrival na sa ospital si Al Rasheed gayung tiniyak sa kanila ng pamunuan ng pnpa na binigyan ito ng first aid bilang bahagi ng standard operating procedure.
Dahil dito, pinag-aaralan na ng pamilya Macadato ang pagsasampa ng kaso laban sa pamunuan ng PNPA upang ilabas ang katotohanan sa likod ng kalunos-lunos na sinapit ng yumaong kadete.
