Kumambiyo ang isa sa mga miyembro ng binuong panel ng gobyerno para makipag-diyalogo sa iba’t ibang mga religous group na si Pastor Boy Saycon sa kanyang naging pahayag.
Ito’y makaraang i-ugnay ni Saycon ang Simbahang Katolika na nasa likod ng di umano’y destabilisasyon o tangkang pagpapabagsak sa administrasyon.
Ayon kay Saycon, bagama’t may ilang mga miyembro aniya ng Simbahan na kritikal kay Pangulong Rodrigo Duterte, hindi naman aniya ang mga ito ang tinutukoy niya.
Biglang ibinaling ni Saycon ang akusasyon sa Partido Liberal na siyang tinukoy niyang isang grupo na may koneksyon umano sa ibayong dagat ang nagkakasa ng mga pagkilos kontra sa pamahalaan.
Mariin naman iyong itinanggi ni Senador Francis Kiko Pangilinan na siyang Pangulo ng LP at tinawag niyang walang batayan ang akusasyon ni Saycon.
Giit pa ni Pangilinan, maituturing aniyang isang uri ng paraan iyon ng administrasyon para ilihis muli ang atensyon ng publiko sa mga malalaking isyu tulad ng kurapsyon, kahirapan, paglaganap ng iligal na droga at iba pa.
—-