Ipinaubaya na ng Malakaniyang sa Presidential Electoral Tribunal (PET) ang desisyon hinggil sa electoral protest na inihain ni dating Senador Bongbong Marcos laban kay Vice President Leni Robredo makaraang matalo sa 2016 Vice presidential race.
Ginawa ng Malakaniyang ang pahayag matapos ipagpaliban ng Korte Suprema sa Oktubre 15 ang deliberasyon sa electoral protest.
Ayon kay Presidential spokesperson Salvador Panelo, igagalang ni Pangulong Rodrigo Duterte anoman ang maging pasya ng PET.
Kasabay nito tiniyak ni Panelo na hindi makikialam ang sangay ng ehekutibo sa anomang hakbang ng mga otoridad at ng PET.
Umaasa lamang umano ang Palasyo na ang magiging desisyon ng PET ay batay sa mga ebidensyang nakalatag.