Umani ng kaliwa’t kanang reaksyon mula sa mga netizens ang pagkakabilang ngayon ng Ninoy Aquino International Airport (NAIA) bilang ika-sampu (10) sa most improved airport sa buong mundo ngayong taon.
Ito’y makaraang ilabas ang nasabing ulat ng aviation consultancy firm na Skytrax World Airport Award 2018 upang kilalanin ang mga nagawang pagbabago at reporma ng Administrasyong Duterte sa pangunahing paliparan ng Pilipinas.
Bagama’t may ilang pabor at natuwa, may ilang naghayag naman ng pangamba tulad ni dating Communications Usec. Manolo Quezon III kung gaano ito tatagal gayundin ay kung ano ang magiging epekto ng pagkaka-alis naman ng NAIA service provider na MIASCOR dahil sa mga insidente ng buklat bagahe ng ilang pasahero.
Magugunitang nalagay sa masamang imahe ang NAIA sa panahon ni dating Pangulong Noynoy Aquino kung saan, naihanay ang naia bilang Worst Airport in the World dahil sa hindi maayos na pasilidad at palpak na serbisyo.
Kasunod nito, pinapurihan naman ng Department of Tourism (DOT) si NAIA General Manager Ed Monreal dahil sa mga drastic changes na ipinatupad nito tulad ng malinis na palikuran, mataas na kalidad ng serbisyo gayundin ang pagbibigay ng mas maginhawang biyahe sa mga pasahero.
