Kasado na ang Oplan Lakbay Alalay ng Department of Public Works and Highways o DPWH para sa undas upang saklolohan ang mga motorista at biyaherong makararanas ng aberya.
Ayon sa DPWH, ilalarga nila ang Oplan Lakbay Alalay simula sa Lunes, Oktubre 30, 5:00 ng hapon hanggang tanghali ng Huwebes, Nobyembre 2.
Magtatalaga ang ahensya ng mahigit isandaang (100) team sa mga pangunahing lansangan sa buong bansa upang tumulong sa mga motorista lalo sa mga masisiraan ng sasakyan.
Katuwang ng DPWH ang Land Transportation Office o LTO, Philippine National Police o PNP at mga opisyal ng local government units (LGU’s).
Samantala, ipinag-utos naman ng kagawaran sa kanilang mga regional office at district engineering office na makipag-ugnayan sa mga contractor ng mga kinukumpuning kalsada para sa schedule ng maintenance work at maagang makapagpalabas ng abiso sa mga motorista.