Blangko pa rin ang Police Regional Office 3 o Central Luzon sa pagkakakilanlan ng mga suspek sa pagpatay kay General Tinio Mayor Ferdinand Bote.
Ayon kay C/Supt. Amador Corpuz, Director ng Police Regional Office 3, batay ito sa inisyal na resulta ng imbestigasyong isinagawa ng kanilang binuong Special Investigation Task Group na tumututok sa kaso.
Bagamat hindi nawawala ang anggulong pulitika, isa sa mga tinitingnan ngayon ng pulisya ay kung may kinalaman ito sa negosyo.
Kilala ang bayan ng General Tinio sa mayamang industriya ng quarry sa Nueva Ecija kung saan kabilang dito ang pamilya ni Mayor Bote.
Magugunitang kahapon, sinasabing nagmula si Mayor Bote sa tanggapan ng DPWH sa Cabanatuan City at patungo na sana sa tanggapan ng NIA o National Irrigation Administration nang tambangan ng tatlong suspek na pawang nakasakay sa motorsiklo.
