Kinilala na ang nawawalang Pinay matapos yanigin ng magnitude 6.4 na lindol ang kilalang tourist city ng Hualien sa Taiwan.
Ayon kay MECO o Manila Economic and Cultural Office Chairman at Resident Representative Lito Banayo, ang nawawalang Overseas Filipino Worker ay si Melody Albano de Castro na taga Ilocos.
Si De Castro ay nagta-trabaho umano bilang caretaker sa isang nursing home na nasa loob ng gusaling gumuho nuong lumindol.
Ipinabatid ni Banayo na hanggang ngayon ay patuloy pa rin ang retrieval operation sa nasabing Pinay, ipinaalam na rin umano ng OWWA-Manila sa kaniyang pamilya ang kalagayan ni De Castro.
Samantala, hindi bababa sa anim ang nasawi habang 76 pa ang nawawala dulot ng nasabing lindol sa Taiwan.
Ayon sa ulat nahihirapan ang ilang rescuers na isagawa ang kanilang operasyon dahil sa pinangangambahang tuluyang gumuho ang gusali sa Hualien.
Posted by: Robert Eugenio
