Posibleng sabayan ng tigil pasada ng mga transport group ang ikalawang SONA o State of the Nation Address ni Pangulong Rodrigo Duterte ngayong araw.
Ito’y upang ipanawagan kay Pangulong Duterte na muling ikunsidera ang plano ng DOTr o Department of Transportation ang plano nitong jeepney phaseout.
Dahil dito, mag-aalok ng libreng sakay ang lokal na pamahalaan ng Valenzuela sa mga ruta ng Mc Arthur Highway mula sa Malanday hanggang Monumento sa Caloocan at pabalik.
May itinalaga ring libreng sakay sa ruta ng Maysan patungong Paso de Blas, Karuhatan patungong Ugong, MH Del Pilar sa Malanday patungong Polo, Sangandaan patungong Polo gayundin ang Polo hanggang Monumento at pabalik.
Maliban sa Valenzuela, may libreng sakay ding i-aalok ang pamahalaang panglungsod ng Taguig na magsisimula alas-6:00 ngayong umaga sa mga itinalagang drop off at pick up points.
Partikular na sa Pio Felipe sa Barangay Hagonoy, Market Market, Petron Ibayo-Tipas, CP Teresa Elementary School, RP Cruz Elementary School, Tipas Elementary School, Jolibee Lower Bicutan, Gate 3 ng Fort Bonifacio gayundin sa Bonifacio Global City.
By Jaymark Dagala
Photo Credit: I Love Taguig / Facebook