Ipinagtanggol ni PDEA Director General Isidro Lapeña ang aksyon ng ground commander sa isinagawang raid sa Cebu Provincial Jail kamakailan.
Ito’y makaraang umani ng batikos mula sa human rights group na Amnesty International ang pagpapahubad sa mga bilanggo sa search operation sa naturang piitan.
Ayon kay Lapeña, ang hakbang ay diskresyon ng ground commander upang matiyak na hindi mauwi sa madugong “scenario” ang sorpresang surprise raid kasunod ng mga ulat na laganap ang illegal drugs sa bilangguan.
Nasa 3600 anya ang mga preso na kailangang i-secure ng halos 300 lamang na miyembro ng raiding team at kung isa man sa mga ito ay biglang maglabas ng armas at manlaban tiyak na pagsisimulan ito ng gulo na maaaring humantong sa mass slaughter.
Samantala, itinanggi din ni Lapeña na nanggaling sa Philippine Drug Enforcement Agency ang mga larawan ng mga nakahubad na inmate dahil maaring nanggaling ito sa mga jail guard na sadyang hindi tinimbrehan sa operasyon upang sirain ang anti-illegal drug operations ng gobyerno.
By: Drew Nacino