Patuloy ang pagtaas ng baha sa ilang bahagi ng Hagonoy, Bulacan bunsod ng tubig na nagmula sa Pampanga river.
Nakadagdag naman sa problema ang high-tide kaya’t ang abot binting tubig kahapon ay hanggang tuhod na ngayon sa 15 barangay.
Ayon sa Hagonoy Municipal Disaster Risk Reduction Management Office, nagmula ang tubig sa lalawigan ng Nueva Ecija at karatig bayan ng Calumpit na dinala ng bagyong Lando.
Bagaman nagsilikas na ang maraming residente na pansamantalang tumutuloy sa San Pedro National High School, pinasok na rin ng baha ang nabanggit na paaralan.
Samantala, nananawagan na ang lokal na pamahalaan ng Hagonoy ng tulong sa national government lalo’t paubos na ang kanilang supply ng pagkain.
By: Drew Nacino
