Tiniyak ni incoming President Rodrigo Duterte na kumikilos na ang pamahalaan para sa pagpapalaya sa Norwegian na si Kjartan Sekkingstad na bihag pa rin ng Abu Sayyaf.
Ito ay matapos ang pagpapalaya ng mga bandido sa Pilipinang si Marites Flor kahapon.
Ayon Duterte, sumasailalim na sa negosyasyon ang hirit ng pamahalaan na mapalaya si Sekkingstad at umaasa silang maisasakatuparan ito sa lalong madaling panahon.
Sa ngayon ang Norwegian national na lamang ang natitirang bihag ng Abu Sayyaf mula sa Samal Island makaraang pugutan ang dalawang Canadian nationals na sina John Ridsdel at Robert Hall habang napalaya naman na ang pilipinang si Flor.
Una rito, nagbanta ang Abu Sayyaf na sasapitin din ng dayuhang si Sekkingstad ang sinapit ng mga pinugutang sina Ridsdel at Hall kung mabibigo ang gobyerno na maibigay ang hinihingi nilang P300 milyong pisong ransom.
By Ralph Obina