Tiniyak ng DOH o Department of Health ang patuloy na pagmomonitor sa mahigit pitong daang libong (700,000) mga kabataan na nabakunahan ng Dengvaxia dengue vaccine.
Sa panayam ng DWIZ, sinabi ni Health Undersecretary Gerardo Bayugo na meron nang hawak na listahan ang kanilang central at regional offices at maging mula sa Department of Education ng mga batang magiging batayan ng kanilang pagmomonitor.
“Kami po sa Department of Health ay masusing nakabantay at naka-agapay sa ating mga kabataan lalo na doon sa mga nabigyan natin ng vaccine at sa susunod pong mga taon hanggang limang taon po, ito po ang ating ipinapangakong gawin, para naman makasiguro na lahat ng mga bata na nabakunahan natin ay mababantayan at mabibigyan ng tulong kung kinakailangan, agapayan at bigyan ng tulong.”
Bukod dito, pinag-aaralan na rin nila ang ilang mga kaso ng mga batang nagkasakit matapos bakunahan ng Dengvaxia at maging ang ilang mga naiulat na kaso ng pagkamatay na patuloy na iniimbestigahan.
“Merong mga naospital yung iba naman ay naka survive na umuwi at gumaling at merong mga pinag aaralan ngayon na mga ilan na namatay dahil sa ang naging diagnosis doon sa ospital ay dengue. Kukuha tayo ng datos dahil meron kaming committee diyan na patuloy na nagsasagawa ng pag-aaral, tinitingnan kung may mga batang may nararamdamang kakaiba, ina-access, itong bang karamdamang ito ay dahil sa bakunang nakuha niya o dahil sa ibang bagay.”
Dagdag ni Bayugo, bagama’t nagpulong ang DOH at Sanofi Pasteur noong nakaraang linggo, hindi pa napag-usapan kung sasagutin ng kumpanya ang pagpapa-ospital at pagpapagamot sa mga batang magkakasakit matapos mabakunahan.
“Yung gagawin ng Sanofi ay wala pa kaming maliwanag na impormasyon na nakuha sa kanila. Although nakipag meeting ang kagawaran nung isang araw, biyernes, pero ang naging discussion lang ay mga technical discussion about the study about the vaccine. Hopefully, kung meron pang susunod na mga pag-uusap ay isa sa mga pwedeng talakayin at bigyan ng linaw.”