Pinangunahan ni Pangulong Ferdinand “Bongbong” Marcos Jr. ang paglulunsad ng Walang Gutom Kitchen ng Department of Social Welfare and Development (DSWD) sa Cebu City ngayong araw, Hunyo 22.
Kasama ng Pangulo si DSWD Secretary Rex Gatchalian sa pagbubukas ng pasilidad na magbibigay ng pagkain at serbisyo sa mga nangangailangang komunidad.
Ito ang ikalawang Walang Gutom Kitchen sa bansa matapos ang unang pasilidad na itinayo sa Pasay City noong Disyembre 2024.
Isang estudyante ang sugatan matapos masagasaan ng van habang tumatawid sa pedestrian lane sa San Mateo, Rizal. Pinatatawag na ng Land Transportation Office (LTO) ang driver ng van at pansamantalang sinuspinde ang lisensya nito habang isinasagawa ang imbestigasyon.
Ayon sa ulat, tumigil ang isang passenger jeep upang bigyang-daan ang estudyante sa General Luna Avenue noong Huwebes. Ilang sandali lamang ay dumating ang isang van na umano’y nag-overtake at hindi napansin ang tumatawid na bata, na nasa tamang tawiran, kaya’t nabundol ito.
Huminto ang van at agad nilapitan ng driver ang biktima. Sakto namang may hospital sa tapat ng tawiran kaya agad naipatingin ang biktima. Nagtamo ng mga galos sa katawan ang biktima, ayon sa San Mateo Police. Sinagot naman ng driver ang gastusin ng bata sa ospital.
Batay sa Land Transportation and Traffic Code, obligadong magbigay-daan ang mga motorista sa mga pedestrian na tumatawid sa crosswalk sa mga business at residential areas, maliban na lamang kung may traffic enforcer o signal signal na kumokontrol sa daloy ng trapiko. Kung walang tawiran, ang mga motorista naman ang may right of way.
Nagpadala ng ang LTO ng show-cause order laban sa driver at nagpatupad ng 90-day preventive suspension sa lisensya nito. Posible pang mapahaba ang suspensyon o tuluyang ma-revoke ang lisensya depende sa magiging resulta ng imbestigasyon.
Muling ipinaalala ni LTO Chief Asec. Markus Lacanilao na dapat unahin ng mga motorista ang mga pedestrian sa mga tawiran, at obligadong huminto ang mga sasakyan kapag may tumatawid. Patuloy pa rin aniya ang ilang mga driver na hindi sumusunod sa batas at hindi nirerespeto ang pedestrian lane, na nagdudulot ng mga aksidente.
Isang ambulansya ang nahulog sa dagat bago pa ito maisakay sa barge sa Hula Hula Port sa Mabuhay, Zamboanga Sibugay.
Ang nahulog na ambulansya ay pinag-tulungang hilahin ng mga tauhan ng Municipal Disaster Risk Reduction and Management Office at Bureau of Fire Protection sa pamamagitan ng rope o tali.
Ayon sa mga otoridad, ligtas na nakapag-embark o napigilan ng driver ang ambulansya bago pa ito tuluyang mahulog bagamat wala namang sakay na pasahero.
Sinabi naman ng BFP na ang ambulansya na pag-aari ng Olutanga Municipal Hospital ay dapat isasakay na sa barge subalit hindi nakapag-break ang driver habang ipinaparada ito kaya’t nahulog sa dagat ang sasakyan.
Sinasabing patungo sa bayan ng Ipil ang naturang ambulansya para kumuha ng isang oxygen tank nang mangyari ang insidente.
Natagpuan ang bangkay ng isang lalaki at isang babae sa loob ng isang nakaparadang sasakyan sa isang gas station sa bahagi ng Tarlac–Pangasinan–La Union Expressway (TPLEX) sa Barangay San Francisco, Victoria, Tarlac.
Ayon sa imbestigasyon, dumaan umano ang sasakyan sa isang coffee shop drive-thru bandang alas-2:00 ng madaling araw noong Miyerkoles at pagkatapos ay pumarada sa parking area.
Napansin ng mga tauhan ng shop ang sasakyan dahil nanatili ito sa lugar buong araw at walang sumasagot nang katukin. Dahil dito, tumawag sila ng mga awtoridad.
Ayon sa pulisya, nasa backseat ng sasakyan ang dalawang bangkay. Sa paunang pagsusuri, wala silang nakitang saksak o tama ng bala ng baril sa mga biktima.
Kasalukuyang hinihintay ang resulta ng forensic examination upang matukoy ang sanhi ng pagkamatay. Nasa kustodiya na ng mga pamilya ang mga labi ng dalawa, at humiling ang mga ito ng privacy habang nagpapatuloy ang imbestigasyon.
#dwiz #dwiznews #aliw23
Patuloy na iniimbestigahan ng Provincial Environment and Natural Resources Office Sarangani ang napaulat na coastal uplift o pag-aangat ng lupa sa mga baybayin ng Glan, Sarangani kasunod ng magnitude 7.8 na lindol noong june 8.
Batay sa inspeksyon ng Sarangani bay protected seascape management office, nalantad sa hangin at araw ang malalawak na bahagi ng dalampasigan, coral reefs, at seagrass beds, partikular sa pangyan marine sanctuary.
Dahil dito, nanganganib ang yamang-dagat sa lugar at nagsimula nang mamatay ang ilang coral, seagrass beds, reef fishes, igat, at mga kabibi na naiwan sa mababaw na bahagi ng baybayin.
Nag-aalala rin ang mga residente sa posibleng epekto sa kalusugan ng mabahong amoy mula sa mga nabubulok na lamang-dagat sa apektadong lugar.
Nakatakdang magsagawa ng mas malalim na pag-aaral ang composite team ng DENR, MGB, at mga lokal na pamahalaan upang matukoy ang lawak ng pinsala at mga kinakailangang hakbang para sa rehabilitasyon ng Sarangani Bay. – mula sa panulat ni Reabelle Medina
Nakatakdang bumisita si Pangulong Ferdinand Marcos Jr. sa Glan Evacuation Center sa Sarangani ngayong araw, Lunes, Hunyo 15, upang personal na suriin ang kalagayan ng mga pamilyang lumikas matapos ang magnitude 7.8 na lindol na yumanig sa Soccsksargen.
Kabilang ang Glan sa mga pinakamalubhang naapektuhan, na nakaranas ng pagguho ng lupa, pagkasira ng mga bahay, at pagkaantala ng mga pangunahing serbisyo. Mahigit 130 pamilya ang nananatili sa evacuation center habang nagpapatuloy ang relief at damage assessment operations.
Inaasahang makikipagpulong ang Pangulo sa mga evacuee at tatanggap ng ulat mula sa mga lokal at pambansang opisyal hinggil sa patuloy na pagtugon at rehabilitasyon sa mga apektadong komunidad.
Photo courtesy: PIA Region XII
Umabot na sa 6,058 aftershocks ang naitala ng PHIVOLCS hanggang Lunes ng umaga, Hunyo 15, isang linggo matapos ang magnitude 7.8 na offshore na lindol na yumanig sa Sarangani at iba pang bahagi ng Mindanao.
Ayon sa ahensya, ang mga aftershock ay may lakas na mula magnitude 1.2 hanggang 6.4.
Patuloy namang binabantayan ng mga awtoridad ang sitwasyon habang isinasagawa ang mga hakbang para sa kaligtasan at pagbangon ng mga apektadong komunidad.
Isinailalim na sa State of Calamity ang bayan ng Alabel sa Sarangani dahil sa matinding pinsala dulot ng magnitude 7.8 na lindol na tumama sa lalawigan nitong Lunes ng umaga.
Sa isang social media post, inanunsyo ng Alabel Information Office ang resolusyon ng Sangguniang Bayan, at hinimok ang mga residente na manatiling alerto habang nagpapatuloy ang assessment at response operations.
Bukod dito, nagdeklara na rin ng State of Calamity si Glan, Sarangani Vice Mayor James Yap Junior.
Ang deklarasyon ng State of Calamity ang magbibigay daan upang agad na maipalabas ang disaster response funds at nagbibigay ng emergency powers sa lokal na pamahalaan na makatutulong sa pagtugon sa pangangailangan ng mga residente. – mula sa panulat Reianne Antiquina
Pinalawig ng Bureau of Internal Revenue ang deadline para sa tax filing, payment, at submission para sa mga taxpayer sa mga lugar na apektado ng malakas na lindol sa Mindanao.
Sa ilalim ng Memorandum Circular No. 62-2026, saklaw ng pinalawig na deadline ang mga nakarehistro sa Revenue District Office 11 o General Santos City, at Sarangani, at RDO 12 o South Cotabato. Nakasaad din sa memorandum na iniurong sa June 30 ang lahat ng deadline na nakatakda mula June 8 hanggang 29.
Ayon sa BIR, hindi papatawan ng penalties, surcharge, at interes ang mga taxpayer basta’t makasusunod sila sa pinalawig na petsa. Layunin ng hakbang na mabigyan ng sapat na panahon ang mga indibidwal at negosyo habang nagpapatuloy ang recovery efforts sa mga naturang lugar. – mula sa panulat ni Reianne Antiquina
Tiniyak ng Department of Energy (DOE) na nananatiling “stable” at sapat ang suplay ng langis sa Southern Mindanao kasunod ng magnitude 7.8 na lindol na yumanig sa rehiyon nitong Hunyo 8.
Ayon kay energy secretary Sharon Garin, walang dahilan ang publiko para magpanic-buying o mag-imbak ng labis na suplay ng gasolina at iba pang produktong petrolyo.
Nakikipag-ugnayan na rin anya ang ahensya sa mga kumpanya ng langis at mga lokal na pamahalaan upang mapabilis ang pagbabalik-operasyon ng mga pasilidad na naapektuhan ng lindol.
Batay sa pagsusuri ng DOE, halos lahat ng pangunahing bulk terminals, depots, storage facilities, at LPG refilling plants sa Regions 11 at 12 ay nananatiling operational.
Sa kabuuang 3,298 na gas stations sa Regions 9, 11, at 12, 47 lamang ang pansamantalang sarado dahil sa minor structural damage, pagkawala ng kuryente, o patuloy na safety evaluations.