Tapos na ang mahabang paghihintay ng ‘JaDine’ fans, dahil sa wakas ay pinaplano’t ginagawa na ang bagong movie project na pagbibidahan ng real life couple na sina James Reid at Nadine Lustre.
Nagbigay ng patikim ang Viva Entertainment sa pamamagitan ng isang 35-second video sa Youtube na may titulong ‘JADINE: Look Test for their Upcoming Movie.’
Sa video, makikita sina James at Nadine na inaayusan para sa kani-kanilang karakter na gagampanan.
Umagaw din ng atensyon ang real tattoo ng dalawa sa kanilang braso na parte ng kanilang karakter.
Maliban kina James at Nadine, nakita rin sa short clip ang direktor na si Antoinette Jadaone na una nang ginawa ang mga serye ng loveteam kagaya ng “On the Wings of Love” at “Till I Met You.”
Sa ngayon ay wala pang ibang detalye ang inilalabas kaugnay sa bagong pelikula.
—-
