Posible umanong abutin pa ng 1 hanggang 2 buwan sa Taiwan ang naarestong puganteng konsehal ng Ozamiz City na si Ricardo ‘Ardot’ Parojinog.
Paliwanag ni Philippine National Police o PNP Chief Director General Oscar Albayalde, may kinakaharap pa kasi itong mga kaso doon na isinampa ng pamahalaan ng Taiwan dahil sa pamemeke ng IDs at iligal na pagpasok sa kanilang bansa.
Bawal rin aniya itong dalawin ng kahit sino ngayon.
Ayon kay Albayalde, magpapadala na sila sa Taiwan ngayong linggo ng mga opisyal ng PNP para tutukan ang kaso ni Ardot.
Kaugnay nito ay sinabi rin ni Albayalde na tukoy na nila kung paano nakalabas ng bansa si Ardot.
Dumaan aniya ito sa backdoor at gumamit ng lantsa.
Ipade-deport sa Pilipinas si Ardot oras na matapos na nitong pagsilbihan ang mga kasong kinakaharap niya roon.
—-