Arestado ang pito katao sa Marawi City matapos magsuot ng uniporme at magpanggap na mga pulis at sundalo nang dumaan sa isang checkpoint doon.
Ayon kay PNP ARMM Regional Director Chief Superintendent Reuben Theodore Sindac, galing Iligan City at papasok sana sa lungsod ng Marawi ang limang lalaki at dalawang babae na sakay ng isang SUV.
Depensa ng mga suspek, makikipagpulong sila sa United Nations member na nagngangalang Captain James Gothrie na nasa loob umano ng Marawi, pero hindi ito bumenta sa mga otoridad na nasa checkpoint.
Nakuha sa mga suspek ang iba’t ibang uniform at patches ng Armed Forces of the Philippines (AFP) at Philippine National Police (PNP), combat boots, iba’t ibang identification cards, kabilang na ang sa Moro National Liberation Front (MNLF).
Nakakukulong na sa Marawi Municipal Police Station ang mga naarestong suspek at nahaharap sa kasong paglabag sa Article 177 o Usurpation of Authority.
- Meann Tanbio | Story from Jonathan Andal
