Patay ang limang (5) miyembro ng di umano’y robbery-holdup group nang maka-engkuwentro ang mga pulis sa barangay Wawa Nasugbu, Batangas.
Ayon kay Chief Inspector Ronald Cayago ng Nasugbu PNP, tatlo sa mga napatay ay magkakapatid na Rudy, Roland at Rico Francisco ng Francisco Robbery Group.
Samantala, ang dalawang iba pa ay nakilalang sina Arian Hernandez at isang alias Scoth Pacia.
Arestado naman ang dalawang iba pa na nakilala lamang sa mga alias na Eva at Eric.
Sinabi ni Chief Superintendent Edward Carranza, hepe ng Calabarzon PNP, maghahain lamang sana ng search warrant ang mga pulis nang bigla silang paputukan ng mga suspek.
Isa pa umanong suspek ang nakatakas at hinahabol ngayon ng mga pulis.
Maliban sa robbery hold-up, napag-alamang sangkot rin sa iligal na droga ang mga napatay.
—-
