Babayaran ng pamahalaan, sa lalung madaling panahon, kahit ang kalahati sa mahigit P930 million na pagkakautang nito sa Philippine Red Cross (PRC).
Ito ang tiniyak ni Presidential Spokesperson Harry Roque, matapos sabihin ni Pangulong Rodrigo Duterte na gagawan ng paraan ng pamahalaan ang naiwang utang ng PhilHealth sa mga ipinrosesong coronavirus disease 2019 (COVID-19) test ng PRC.
Ayon kay Roque, bagama’t hindi niya maidetalye ay nagkakaroon ng pag-uusap para bahagyang makatawad ang pamahalaan sa sinisingil ng Red Cross.
Dagdag ni Roque, may mga sinimulan na ring gawing papeles kaya nakatitiyak siyang mababayaran na agad kahit ang kalahati sa kabuuang utang ng pamahalaan.
Una nang sinabi ni Philhealth Spokesperson Rey Baleña na target nilang maaayos ang pagkakautang sa PRC sa loob ng isang buwan.
Maliban dito, hinihintay pa rin aniya nila ang clearance mula Department of Budget and Management para maipagpatuloy ang pagbabayad Sa Red Cross.
