Tiniyak ng Philippine National Police (PNP) na kumikilos ang mga kinauukulang yunit ng pulisya para siguruhing naihahatid sa kanilang mga tauhan sa tamang oras ang mga kagamitang kinakailangan ng mga ito.
Ito ang inihayag ni PNP Chief P/Gen. Guillermo Eleazar matapos na lumabas sa audit report ng Commission on Audit na hindi tugma ang datos ng kanilang mga Police Regional Office sa National Headquarters hinggil sa deliveries ng mga kagamitan para sa mga pulis.
Dahil dito, inatasan na ni Eleazar ang kanilang Directorate for Logistics, Directorate for Comptrollership at ang PNP Accounting Division para imbestigahan ang usapin.
Binigyang diin ng PNP Chief na kailangang maitama ang anumang pagkakamali sa kanilang datos upang masiguro sa pamahalaan at taumbayan na walang iregularidad sa pamamahagi ng kanilang mga armas at kagamitan.
Tiniyak naman ni Eleazar sa COA na transparent ang PNP sa bidding, pagbili at pamamahagi ng kanilang kagamitan. —sa panulat ni Hyacinth Ludivico mula sa ulat ni Patrol 9 Jaymark Dagala
