Inaresto ng mga tauhan ng Integrity Monitoring and Enforcement Group (IMEG) ng Pambansang Pulisya ang isang kabaro nito na inirereklamo sa kasong robbery – extortion.
Kinilala ni IMEG acting Director P/Col Thomas Frias Jr., ang naarestong si P/Staff Sgt. Marlon De Dios Salim, kasalukuyang nakatalaga sa SLEX Traffic Vehicular Sub Office, Regional Highway Patrol Unit ng NCR sa Parañaque City.
Tuluyang nadakip si Salim matapos na positibo nitong tanggapin ang P5,000 marked money na iniabot sa kaniya ng complainant sa ikinasa nilang entrapment operations kahapon.
Nag ugat ang reklamo sa nangyaring insidente sa trapiko nuong Enero 26 sa north bound ng Skyway sakop ng Brgy. San Martin De Porres kung saan, hiningan ni Salim ang complainant ng P15,000 kapalit ng pagre-release ng van na nasangkot sa insidente .
Subalit matapos ang serye ng negosasyon at tawaran, bumaba na sa P5,000 ang hinihingi ng pulis na siyang nag-udyok sa complainant na magpasaklolo sa imeg para sa agarang aksyon .
Kasalukuyang nasa Kampo Crame na si Salim na nahaharap sa patumpatong na mga kasong administratibo at kriminal at nanganganib ding masibak sa serbisyo sakaling mapatunayan ang pagkakasala nito. — ulat mula kay Jaymark Dagala (Patrol 9)
