Ipinataw ng Philippine Overseas Employment Administration (POEA) ang total deployment ban ng mga Filipino workers sa Ethiopia dahil sa kaguluhan sa bansa sa pagitan ng gobyerno at rebelde.
Base sa resolusyong nilagdaan ni POEA governing board chairman at Department of Labor and Employment (DOLE) Secretary Silvestre Bello, III, iniutos nito sa kinauukulang gobyerno na bumuo ng isang plano ukol sa agarang pagpapauwi sa mga Pilipino sa nasabing bansa.
Noong Nobyembre 8, ipinaalam ng DFA sa DOLE na itinaas nito ang crisis Alert level sa Ethiopia sa Alert level 4 bilang tugon sa kaguluhan doon sa pagitan ng Tigray People’s Liberation Front (TPLF) at ng pamahalaan ng Ethiopia.
Base sa United Nations, nag-iwan ng libo-libong patay ang kaguluhang ito at nagtulak sa 400,000 na katao sa famine-like conditions.
Sa ilalim ng Alert level 4, ipinatutupad ang total ban sa pag-proseso at deployment ng lahat ng manggagawa at isinasagawa ang mandatoryong pagpapauwi sa mga OFWs.
Samantala, nakikipag-ugnayan na ang Philippine Embassy sa Cairo, Egypt sa mga Pilipino sa Ethiopia ukol sa Repatriation.
