Itinanggi ng self-confessed drug dealer na si Kerwin Espinosa na plano niyang tumakas mula sa detention facility ng National Bureau of Investigation.
Ayon kay Espinosa, iba ang kanyang selda sa tinutukoy sa report kung saan nadiskubre ang isang butas sa kisame.
Una nang inihayag ni NBI Officer in Charge Eric Distor na nakatanggap sila ng impormasyon na plano ni Espinosa at dalawang iba pa na pumuga sa pamamagitan ng pagdaan sa butas ng exhaust fan sa kisame noong January 13.
Agad namang nag-inspeksyon ang NBI at tumambad sa kanila ang butas sa isa sa mga selda kung saan maaaring makatakas o makalusot ang isang preso.
Samantala, inihayag ng Department of Justice na dapat ng ilipat sa ibang bilangguan si Espinosa.
