Tagumpay para sa Teacher’s Dignity Coalition ang pagkakapasa ng House Bill 5412 o “Election Service Reform Act”.
Sa panayam ng DWIZ, sinabi ni Benjo Basas, National Chairperson ng TDC na sa ilalim ng panukalang batas, hindi na compulsory o sapilitan ang pagseserbisyo ng mga guro kapag eleksyon, kundi gagawin nang voluntary.
“Masaya po kami na for the longest time alam naman natin na ito’y inilalaban ng ating organisasyon at ng iba pang mga grupo na ngayon lamang nag-materialize, sana hindi ito i-veto ng ating Pangulo, pero mukhang hindi naman dahil wala naman itong kasangkot na salapi at wala naman pong maba-bankrupt siguro.” Ani Basas.
Aminado si Basas na bukod sa maliit na honorarium na tinatanggap ng mga guro na nagsisilbing board of election inspectors (BEI’s) tuwing halalan, malaking usapin din ang nararanasang harassment ng ilan sa mga ito.
“Ang aming hinahabol pa dito ay yung treatment, yung uri ng pagtrato doon sa ating mga guro pagdating ng eleksyon, of course isa yan, kasi hanggang ngayon and even itong 2016 elections, doon sa resolusyon na ipinasa ng COMELEC noong Disyembre ay lumalabas po na P3,000 pa rin ang honorarium na ibibigay sa ating mga guro, at sa tingin naming ay hindi ito sapat.” Pahayag ni Basas.
By Meann Tanbio | Ratsada Balita
