Binigyan ng Korte Suprema ng sampung araw ang JBC o Judicial and Bar Council na magkomento sa kahilingan ni House Committee on Justice Chairman Reynaldo Umali na magkaroon muli ng tig-isang kinatawan ang Senado at Kamara sa JBC.
Sa petisyon ni Umali, mayroon aniyang intensyon noon na pag-isahin ang mataas at mababang kapulungan ng kongreso kaya isinaad sa konstitusyon na isa lang ang gawing kinatawan ng mga ito.
Sinabi pa ng Congressman, panahon na para balikan ng Korte Suprema ang original intent ng saligang batas at ng mga bumuo nito.
Dapat aniyang magkaroon na ng sapat na kinatawan sa JBC ang Senado at Kamara upang hindi ma-disenfranchise ang isa dahil sa umiiral na term-sharing sa pagitan ng dalawang kapulungan ng Kongreso.
Matatandaang sa desisyon ng Supreme Court noong 2012 sa Francisco Chavez Versus JBC, ipinaliwanag ng kataas-taasang hukuman na hindi nito tungkuling amyendahan ang konstitusyon kundi mag-interpret lamang ng mga batas.
By: Avee Devierte / Bert Mozo
