Nakatakda nang hatulan ng Malolos Regional Trial Court si Retired Army Major General Jovito Palparan at dalawa pang kasamang akusado nito sa Setyembre 17.
Kaugnay ito ng kinakaharap na kasong kidnapping at serious illegal detention dahil sa pagkawala ng dalawang estudyante ng University of the Philippines na sina Shirley Cadapan at Karen Empeño noong 2006.
Sa ipinadalang abiso ng Malolos RTC, kasama ni Palparan na pinahaharap sa korte ang mga kapwa akusado nitong sina Lt. Col. Felipe Anitado Jr. at Staff Sergeant Edgardo Osorio.
Hunyo 26 ng taong 2006 nang mapaulat ang pagdukot kina Cadapan at Empeño ng mga armadong lalaki sa isang bahay sa barangay San Miguel Hagonoy Bulacan.
Sinasabing tinorture ng mga tauhan ni Palparan hanggang sa masawi ang dalawang estudyante na hindi pa rin natatagpuan hanggang ngayon.
—-
