Patuloy na tumataas ang reproduction rate ng coronavirus disease 2019 (COVID-19) sa National Capital Region (NCR).
Ito ang lumabas sa pinakahuling pag-aaral ng University of the Philippines – OCTA research group kung saan naitala sa 0.99 ang reproduction rate sa NCR nitong Disyembre 11.
Ayon kay Professor Guido David ng OCTA research, posibleng tumaas pa sa 1.0 ang reproduction rate ng COVID-19 sa NCR sa susunod na dalawang araw.
Pangunahin aniyang dahilan nito ang dumaraming bilang ng mga taong lumalabas at nagtutungo sa iba’t-ibang lugar habang papalapit na ang kapaskuhan.
Umaasa naman si David na malalagpasan ng bansa ang naturang pagtaas sa reproduction rate o ang average na bilang ng mga nahahawaan ng COVID-19 ng isang infected na tao sa isang populasyon.
Batay sa OCTA research, naitala sa 0.90 ang reproduction rate ng COVID-19 pagpasok ng December mula sa 0.88 noong Nobyembre.
Tumaas ito sa 0.94 noong December 5 at umabot sa 0.96 nitong December 10.