Patuloy ang pagtaas ng presyo ng ilang klase ng gulay sa Metro Manila bunsod ng kakulangan umano ng supply.
Kabilang sa mga nagmahal ang sibuyas, na paunti-unti ang pagde-deliver sa mga palengke sa National Capital Region.
Aabot na sa P220 ang kada kilo ng puting sibuyas mula sa dating P190.
Ayon sa Samahang Industriya ng Agrikultura (SINAG), ubos na ang lokal na produksyon ng puting sibuyas kaya tumataas ang presyo nito.
Kaya iminumungkahi ni SINAG chairman Rosendo So ang pag-angkat ng nasabing produkto lalo’t may mga ulat na may ipinupuslit umanong puting sibuyas papuntang Luzon.
Tumaas din anya ang presyo ng carrots, gaya sa Trabaho Market at Divisoria, Maynila na umaabot na sa P100 kada kilo kumpara sa P80 hanggang P90 noong isang linggo.
Aminado naman ang Department of Agriculture na bagaman naantala ang pagbiyahe ng mga gulay mula Benguet noong nakaraang linggo dahil sa lindol, normal na sa ngayon ang dating ng supply sa Metro Manila mula Northern Luzon.
Inaalam na rin ng Kagawaran ang dahilan ng pag-doble o tripleng patong sa presyo ng gulay sa mga pamilihan kahit mababa ang farm gate price ng mga magsasaka sa Benguet Trading Post.
