Inaasahang aabot sa 123.96 million ang populasyon ng bansa pagsapit ng 2035.
Ayon sa Philippine Statistics Authority, ibig sabihin nito ay may karagdagang tinatayang 14.76 milyong katao mula sa naitalang populasyon na 109.20 million noong 2020.
Batay sa PSA, lumabas sa projection ang average annual population growth rate na 0.85% mula 2020 hanggang 2035.
Pagsapit ng 2035, tinatayang aabot sa 62.64 million ang populasyon ng kalalakihan, o 50.5% ng kabuuang populasyon, habang ang kababaihan naman ay inaasahang aabot sa 61.32 million, o 49.5%.
Sinabi rin ng PSA na ang Calabarzon Region ang inaasahang mananatiling pinakamataong rehiyon sa 2035, na may tinatayang populasyon na 19.07 million.
Susundan ito ng National Capital Region na may inaasahang populasyon na 14.49 million at Central Luzon na 14.02 million.
Inaasahan namang magkakaroon ng pinakamaliit na populasyon ang Cordillera Administrative Region sa 2035, na may tinatayang 2.13 million.
