Nagpasaklolo na ang pamahalaang lungsod ng Quezon sa Pambansang Pulisya para tumulong sa paghahanap sa walo pang mga pasahero ng emirates flight na sinakyan naman ng lalaking nagpositibo sa bagong variant ng COVID-19.
Ayon kay Quezon City Epidemiology and Surveillance Unit Head Dr. Rolly Cruz, tukoy na nila ang pagkakakilanlan ng walo pang pasahero at pawang residente ang mga ito ng lungsod.
Kasunod nito, sinabi ni Cruz, na may anim na rin silang nakausap na kapwa pasahero rin ng lalaking nagpositibo sa bagong variant ng virus na naka-quarantine na sa bahay at hotel.
Habang mayruon aniyang dalawang iba pang pasahero na mali ang numero kaya’t pupuntahan na sila ng pulisya para isailalim sa tanungan.
Paglilinaw pa ni Cruz, hindi nila isasailalim sa lockdown ang mga barangay kung saan nakatira ang iba pang mga pasahero ng nasabing eroplano.
