Nakikipag-ugnayan na ang Philippine National Police o PNP sa mga Local Government Units o LGUs para sa pagpapatupad ng curfew sa mga kabataan.
Ito’y kasunod ng naging desisyon ng malakanyang na itigil na ang pagpapatupad ng uniform curfew hours sa Metro Manila mula alas-12 ng hatinggabi hanggang alas-4 ng umaga.
Ayon kay PNP Chief PGen. Guillermo Eleazar, may sariling ordinansa pa rin ang mga LGUs na nagtatakda ng curfew sa mga menor de edad.
Dagdag pa ni Eleazar, kailangan lang malinaw sa mga local police ang mga patakaran ng kani-kanilang LGUs upang maaayos ang maipatutupad na curfew ordinance.
Sa kabila ng pagpapatigil ng uniform curfew sa NCR, sinisiguro ni Eleazar na patuloy na magpapatrolya ang mga pulis kontra kriminalidad.
