Sumampa na sa P1.13-B ang halaga ng pinsala sa imprastraktura bunsod ng pagbaha dulot ng matinding pag-ulang dala ng shear line sa Visayas at Mindanao.
Batay pa sa datos ng National Disaster Risk Reduction Management Council (NDRRMC), pumalo sa P232.7-M ang naitalang danyos sa agrikultura habang mahigit P2-M naman ng pinsala ang namonitor ng National Irrigation Administration.
Aabot sa kabuuang 4,522 na kabahayan ang nasira kung saan, 3,679 ang partially damaged at 843 naman ang totally damaged.
Sinabi pa ng NDRRMC na 21 siyudad at munisipalidad ang nagdeklara ng state of calamity kabilang ang Llorente sa Eastern Samar; Dapitan at Polanco sa Zamboanga Del Norte; Gingoog sa Misamis Oriental; at ang buong lalawigan ng Misamis Occidental.
Samantala, tumuntong na sa 44 ang bilang ng mga napaulat na nasawi habang 28 naman ang nawawala.
Naapektuhan din ng masamang panahon ang aabot sa 131,028 families o katumbas ng 509,340 individuals sa Bicol, Western Visayas, Central Visayas, Eastern Visayas, Zamboanga, Northern Mindanao, Davao, CARAGA at Bangsamoro Autonomous Region in Muslim Mindanao.