Arestado ang isang Filipino lawyer sa Canada kaugnay sa pagkamatay ng isang Canadian University Instructor.
Nakilala ang suspek na si Rogelio Butch Bagabuyo, 54 anyos at kinasuhan ng Canadian authorities ng may kaugnayan sa pakikialam sa labi ng biktima.
Nakalaya naman kaagad si Bagabuyo matapos mag piyansa at wala na itong ipinalabas na pahayag hinggil sa kaso.
Ang nasabing kaso ay may kaugnayan sa pagpatay sa 70 anyos na si Mohd Abdullah na nagtuturo na ng 21 taon sa Thompson Riverside University sa Kamloops, British Columbia.
March 11 nang mawala si Abdullah at natagpuan ang labi nito ng nakasilid sa isang plastic sa loob ng isang abandonang van sa Monterey Place.
Kinumpirma naman ng Kamloops British Columbia Royal Canadian Mounted Police na pinatay ang biktima subalit wala nang iba pang inilabas na detalye.
Ibinunyag ng anak ni Abdullah na malapit na magkaibigan ang kanyang ama at Pinoy lawyer na siyang tumutulong sa biktima sa paggawa nito ng kanyang last will and testament.
