Pinagtibay ng Korte Suprema ang joint resolution ng Senado at Kamara na nagpapalawig ng isa pang taon sa idineklarang batas militar sa Mindanao.
Sa botong 10-5 kumbinsido ang high tribunal na may sapat na factual basis ang ginawang pagpapalawig ng kongreso sa batas militar sa Mindanao mula Enero 1 hanggang Disyembre 30 ng taong kasalukuyan.
Naatasang magponente o magsulat ng desisyon si SC Associate Justice Noel Tijam sa panig ng mayorya kasama sina Associate Justices Presbitero Velasco, Teresita Leonardo De Castro, Diosdado Peralta, Estela Perlas Bernabe, Lucas Bersamin, Mariano Del Castillo, Samuel Martires, Andres Reyes at Alexander Gesmundo na bumoto pabor sa inaprubahang resolusyon
Habang tutol naman sina Chief Justice Maria Lourdes Sereno gayundin sina Senior Associate Justice Antonio Carpio, Associate Justices Marvic Leonen, Andres Reyes at Francis Jardeleza.
Ipinunto ng Supreme Court na hindi umano dapat na maisailalim sa judicial review ang pasya ng Kongreso at ang pagmamadali sa pag-apruba sa hiling ng punong ehekutibo na palawigin ang Martial Law extension ay hindi batayan para mapawalang bisa ito
Sa huli, kumbinsido rin ang high tribunal na mayroon pa ring umiiral na rebelyon sa Mindanao at mayroon pa ring panganib sa kaligtasan ng publiko batay na rin sa mga inilatag na impormasyon ng militar gayundin ang mga pangyayari sa rehiyon.
Ulat ni DWIZ Patrol Reporter Bert Mozo
Posted by: Robert Eugenio