Posibleng matulad si Pangulong Ferdinand “Bongbong” Marcos Junior sa sinapit ng kanyang amang si dating Pangulong Ferdinand Marcos Senior na pinatalsik sa pamamagitan ng EDSA People Power Revolution.
Ito ang pananaw ng political strategist na si Lito Banayo sa gitna ng kaliwa’t kanang kontrobersya na kinakaharap ng administrasyon ni Pangulong Marcos Junior.
Ayon kay Banayo, kung hindi aayusin ng gobyerno ang trabaho nito, partikular sa pagpapanagot sa mga sangkot sa katiwalian sa flood control scandal, ay talagang maiinip at mauubos ang pasensya ng taumbayan.
Gayunman, hindi anya magiging maganda para sa bayan ang pagpapatalsik sa pangulo, lalo sa ekonomiya.
Samantala, aminado ang dating chairman ng Manila Economic and Cultural Office na hindi pa niya matiyak kung ang mga isiniwalat ni dating Congressman Zaldy Co ang sukdulan o maging mitsa ng posibleng pag-aalsa ng taumbayan laban sa pamahalaan.
