Patuloy na iniimbestigahan ng tanggapan ng Ombudsman si dating Davao City Vice Mayor Paolo ‘Pulong’ Duterte.
Ito ang isiniwalat mismo ni outgoing Ombudsman Conchita Carpio Morales bagama’t tumanggi na itong idetalye kung anong partikular na kaso ito.
Ang rebelasyon ni Morales ay nag-ugat nang tanungin ito sa update hinggil sa imbestigasyon laban kay Pangulong Rodrigo Duterte kaugnay ng umano’y mga tagong yaman nito na matagal na aniyang sarado at naibasura.
Batay naman sa listahan mula sa tanggapan ng Ombudsman, meron pang limang kaso laban sa nakababatang Duterte ang patuloy na iniimbestigahan, kabilang ang graft, forfeiture, perjury, violation of code of conduct of public officials at grave misconduct and serious dishonesty.
Magugunita namang una nang naaswelto si Pulong Duterte sa kaso kaugnay ng mahigit anim na bilyong pisong shabu shipment sa bansa.
(Ulat ni Jill Resontoc)