Kumpiyansa si House Majority Leader Ferdinand Martin Romualdez na lulusot na sa senado ang mga panukalang pagtatatag ng Department of Disaster Resilience at Government Financial Institutions Unified Initiatives to Distressed Enterprises for Economic Recovery o GUIDE.
Ayon kay Romualdez, higit na kinakailangan ang mga nabanggit na panukala ngayong may umiiral na krisis sa bansa dahil sa COVID-19 pandemic.
Naniniwala ang mambabatas na malaki ang maitutulong nito sa mga maliliit na negosyo na labis na pinadapa ng pandemiyang nararanasan ng bansa.
Dahil dito, umaasa si Romualdez na hindi magtatagal at maipapasa na rin bilang ganap na batas ang dalawang nabanggit na panukala bago magsara ang ika-18 kongreso.
