Hinimok ni dating senador JV Ejercito ang Board of Directors ng PhilHealth na suspindihin muna ang pagtataas ng premium contributions ng kanilang mga miyembro sa susunod na taon.
Ayon kay Ejercito, tila pagiging insensitibo ang naturang hakbang ng PhilHealth sa dami ng pinagdaanan ng mga tao ngayong taon dahil sa pandemya.
Ipinunto rin ng dating senador na hindi pa nasosolusyunan ang isyu ng kurapsyon sa mismong ahensya.
Sinabi rin ni Ejercito, principal author ng Universal Health Care Law na maaaring humirit ang Department of Health at PhilHealth ng supplemental funding sa kongreso.
Una rito inihayag ng PhilHealth na ang pagtataas ng kontribusyon sa susunod na taon ay para matiyak na sapat ang pondo ng healthcare benefits sa ilalim ng UHC law.
