Nagpasalamat ang kinatawan ng European Union (EU) sa Association of Southeast Asian Nation o ASEAN hinggil sa pagsuporta ng Pilipinas sa panawagang itigil na ng Russia ang opensibang militar nito sa Ukraine.
Ito ang inihayag ni EU Ambassador Igor Driesmans sa kaniyang isinagawang courtesy call kay Defense Sec. Delfin Lorenzana sa Kampo Aguinaldo.
Sa nangyaring pulong, kapwa nagpahayag ng pangamba ang dalawang opisyal hinggil sa matinding pangyayari ngayon sa Ukraine.
Nagdulot ito ng pagka-alarma para kay Driesmans para sa mga sibilyang naiipit sa bakbakan at nagsisilikas sa tinatawag na “humanitarian corridor”.
Sa kaniyang panig, nagpaabot din ng pasasalamat si Lorenzana sa EU dahil sa patuloy na pagsusulong nito ng kapayapaan gayundin sa pagtataguyod ng seguridad sa West Philippine Sea at isang “rules based order” sa rehiyon alinsunod sa itinatakda ng international law. —ulat mula kay Jaymark Dagala (Patrol 9)