Pumalag ang Department of Labor and Employment sa lumabas na ulat ng International Trade Union Confederation o ITUC na kabilang ang Pilipinas sa sampung bansa sa mundo na ‘worst’ pagdating sa usapin ng karapatan ng mga manggagawa.
Batay sa ulat ng ITUC kabilang ang Pilipinas sa ’10 worst countries for workers rights’ kasama ang mga bansang Algeria, Bangladesh, Cambodia, Colombia, Egypt, Guatemala, Kazakhstan, Saudi Arabia at Turkey kung saan maaring makaranas ang mga ito ng karahasan gaya ng ‘intimidation’ at paghihiganti sa trabaho.
Ayon kay Labor secretary Silvestre Bello III, bagamat ginagalang nila ang nasabing ulat ay wala naman aniyang basehan para sang–ayunan ito.
Pagmamalaki ni Bello, kung ikukumpara noon ay mas maaayos na ang sektor ng paggawa ngayon lalo na’t ginagawa ng administrasyon ang lahat para tugunan ang problema ng manggagawa sa bansa.
Kabilang aniya sa mga napagtagumpayan ng gobyerno ay ang pagbaba ng ‘unemployment rate’ gayundin ang patas na kampanya laban sa mga employers na nagpapatupad iligal na kontraktwalisasyon.