Iginiit ng Department of Foreign Affairs na hindi magiging madali ang pagpapauwi sa limang Pilipinong napaulat na “prisoners of war” sa Ukraine.
Ayon sa DFA, komplikado ang sitwasyon ng limang Pilipino na nagsilbi rin umano bilang mga mersenaryo para sa Russia.
Ipinaliwanag ni DFA spokesperson, Ambassador Angelica Escalona, na ang pagkuha ng access sa mga bihag ng digmaan ay saklaw ng international law at ng mga patakaran ng bansang may kustodiya sa kanila.
Nakipag-ugnayan na rin anya ang pamahalaan sa Ukraine at Russia sa pamamagitan ng kani-kanilang embahada sa Maynila.
Aniya, kinilala ng dalawang panig ang kahilingan ng Pilipinas para sa tulong, ngunit nananatiling komplikado ang proseso.
Sa ilalim ng Geneva Conventions, ang International Committee of the Red Cross ang nagsisilbing “neutral intermediary” para sa pagpapalaya o pagpapauwi ng mga bihag ng digmaan.
