Hindi na kailangan pang ipakita sa publiko ang gagawing pagpapabakuna ni Pang. Rodrigo Duterte sakaling magdesisyon itong mauna nang magpaturok ng COVID-19 vaccine.
Ayon kay Presidential Spokesperson Atty. Harry Roque, hindi na kailangan pang ipakita ni Pang. Duterte sa taumbayan ang kanyang aktuwal na pagpapaturok ng vaccine para lamang daw tumaas ang kumpiyansa ng mga Pilipino sa bakuna kontra COVID-19.
Paliwanag ni Roque, normal lamang talaga aniya na sa una ay mababa ang tiwala ng mga Pilipino sa aangkating vaccine ng Pilipinas dahil karamihan ay nais munang makita ang epekto nito sa mga unang mababakunahan.
Pero tiwala aniya siya na kung makikita naman ng publiko na walang nasawi at nagkaroon ng pagbaba ang kaso ng COVID-19 sa bansa, tiyak aniyang mahihikayat din ang taumbayan na magpaturok ng bakuna kontra virus.
