Lusot na sa ikalawang pagbasa sa Kamara ang panukalang magpapataw ng mas mabigat na parusa sa mga magpapakalat ng pekeng bomb threat.
Sa pamamagitan ng viva voce voting, nakapasa ang House Bill 9059 o Anti False Bomb Threat Act.
Sa ilalim ng nasabing panukala, tinitiyak ang pagbibigay proteksyon sa publiko laban sa mga nagkakalat ng pekeng impormasyon hinggil sa pagbabanta ng anumang uri ng pampasabog.
Pinipigilan ng nasabing panukala ang sinuman sa pagpapakalat ng fake bomb threats o explosive threats gamit ang mail, electronic mail, telephone, cellular phone, fax machine, telegraph, printed materials, social media at iba pang linya ng komunikasyon para maiwasang mag panic ang publiko.
Kulong ng isang taon at multang 5,00 piso o parehong parusa depende sa desisyon ng korte ang matatanggap ng sinumang lalabag dito.
Kung ang pekeng banta na bomb threat ay mauuwi sa paglikas sa mga tahanan, gusali at public transportation gayundin ang pagpapatigil ng serbisyo na maaaring mag resulta sa pagkalugi, kaguluhan o kamatayan ay mahaharap naman sa parusang hindi hihigit sa limang taong pagkakakulong at multang isang milyong piso.