Muling binigyang-diin ni Senador Bong Go ang pangangailangan na mapaigting pa ang kampanya sa bakuna kontra coronavirus disease 2019 (COVID-19) upang mapataas pa ang tiwala ng publiko rito.
Ayon kay Go, na sya ring chair ng Senate Committee on Health and Demography, nakapag-aalala ang paunang ulat na nasa 1-milyon lamang sa 2.1-milyon na mga nabakunahan ng first dose ng COVID-19 vaccine ang bumalik para sa kanilang ikalawang dose ng bakuna.
Gayunman, nilinaw naman aniya ito ng Department of Health (DOH) kung saan inilahad ng ahensya na nasa 113,000 katao lamang o 9% ng mga nabakunahan ang ipinagpaliban ang kanilang second dose.
Dahil dito, ayon kay Go, ipinarating nya pa rin ang naturang bagay kay Pangulong Rodrigo Duterte at iminungkahi ang pagpapaigting ng kampanya upang mapalakas ang tiwala ng publiko sa mga bakuna.
Binigyang-diin din ng senador na ang tagumpay ng vaccination program ang susi sa panunumbalik ng Pilipinas sa normal nitong pamumuhay.
