Patay ang dalawa katao matapos pagbabarilin ng dalawang hindi pa nakikilalang suspek na nakamotorsiklo sa New Manila, Quezon City nitong gabi ng Miyerkules.
Ayon sa ulat, nasa loob ng kanilang sasakyan ang dalawang biktima nang hatakin ang babae na isa sa kanila at binaril sa kahabaan ng Broadway Avenue corner 6th Street sa Barangay Mariana, pasado alas-7 ng gabi.
Sa loob naman ng sasakyan binaril ang isa pa nitong kasama.
Ayon sa mga nakasaksi sa krimen, nakuha pang humingi ng saklolo ang babaeng biktima bago pa ito tuluyang mawalan ng buhay makaraang umalis sa pinangyarihan ng krimen ang dalawang suspek.
Sa ngayon ay iniimbestigahan na ng Quezon City Police District ang naturang insidente at kinakalap ang mga CCTV footages sa pinangyarihan ng krimen upang matukoy ang pagkakakilanlan ng mga suspek.
