Nais ni Senador Sherwin Gatchalian na pag-aralan at busisiin kung epektibo ang paggamit ng mother tounge language sa ilalim ng K-12 curriculum.
Sa kanyang privilege speech, iginiit ni Sen. Gatchalian, Chairman ng Senate Committee on Basic Education, na panahon nang magsagawa ng national impact evaluation sa implementasyon ng mother tongue-based multilingual education program.
Batay aniya sa kanilang inisyal na impormasyon, lumilitaw na may problema sa ilang lugar sa bansa dahil sa magkakaibang lenggwahe na ginagamit.
Binigyang-diin ng senador na sa ilang lalawigan, ginagamit nilang lenggwahe sa pagtuturo ang regional language na hindi naman naiintindihan ng ibang mga estudyante.
Nagiging paraan din aniya ito ng diskriminasyon dahil may mga mag-aaral na hindi naman sanay sa pagsasalita ng regional language.
Nangako naman ang senador na magsasagawa sila ng mga pagdinig hinggil dito upang makabuo ng mga bagong polisiya para sa kapakanan ng mga mag-aaral.
