Target na ng Metropolitan Manila Development Authority na buksan ang mga kalsada sa loob ng mga gated village upang maibsan ang inaasahang traffic congestion ngayong holiday season.
Ayon kay MMDA Traffic Enforcement Group Director, Atty. Victor Nuñez, makikipagpulong siya sa mga local government unit bukas upang talakayin ang traffic plans, kabilang ang mungkahing buksan ang mga kalsada sa loob ng mga subdivision.
Dapat anyang pahintulutan ang nasabing hakbang lalo’t apektado rin naman ang mga residente sa mga gated community.
Tatalakayin din ang mga plano para sa mga Christmas bazaar at tiangge na kadalasang nagdudulot ng pagsisikip ng daloy ng trapiko.
Samantala, nilinaw ni Nuñez na bagaman hindi bahagi ng Metro Manila ang Cainta at Antipolo City, Rizal nakikipag-ugnayan na sila sa mga head ng mga naturang LGU.
Nitong weekend nang abutin hanggang alas dose ng hatinggabi ang matinding traffic congestion sa bahagi ng Marcos Highway sa boundary ng Antipolo, Cainta, Marikina at Pasig cities dahil sa malaking volume ng mga sasakyan at counterflow.
