Nahaharap sa malaking problema ngayon ang gobyerno kasunod ng pahayag ng pharmaceutical company na Sanofi na hindi ligtas i-bakuna ang dengvaxia sa mga taong hindi pa nagkakasakit ng dengue.
Ayon kay Dr. Anthony Leachon, isang independent health advocate at dating Pangulo ng Philippine College of Physician Foundation, kailangan na hanapin at isa-isahin ng Department of Health o DOH ang higit 500,000 mga estudyanteng binakunahan laban sa dengue.
Posible aniyang ang mga nabakunahan na hindi pa na-expose sa dengue virus ay makaranas ng severe dengue.
“Pinakamalaking problema dito at sabi niyo gusto niyong malaman kung buhay pa ba ang pasyente? kung ang estudyante ay nakatira sa bundok o malayong lugar na walang ospital, hindi mo alam kung namatay sa lagnat, yun pala ay side effect ng gamot.” Ani Leachon
Isa pang dapat na solusyunan ng gobyerno ayon kay Leachon ay ang nalalapit nang expiration ng natitira pang 1.5 billion pesos na halaga ng dengvaxia vaccine.
“Umorder tayo ng napakarami ay hindi naman po pala natin mauubos, at ngayon mayroon nang threat na mag-eexpire at masasayang, dapat ang government pag-isipan kung anong gagawin.” Dagdag ni Leachon
Anomalya sa procurement?
Kasabay nito, isinusulong ni Dr. Anthony Leachon na maimbestgahan ang naging procurement ng dengvaxia vaccine sa bansa.
Kasunod ito ng paglilinaw ng pharmaceutical company na Sanofi na maaari lamang ibakuna ang dengvaxia sa mga taong dati nang na-expose sa dengue virus.
Ayon kay Leachon, sa kabila ng pagtutol at walang malalimang pag-aaral ay gigil na bumili agad ang DOH ng bakuna na nagkakahalaga ng tatlong bilyong piso.
Kuwestyonable din aniya na agad itong ipinabakuna sa ilang estudyante sa pampublikong paaralan sa halip na subukan ito sa mas maliit na grupo.
“Ang bakuna ay dapat in the presence muna of the doctor or the nurse, eh paano kung itong eskwela ay nasa rural areas paano ka babantayan, yun ang sinasabi natin dapat hindi siya minadali at hindi naman kailangang-kailangan kagaya ngayon wala namang dengue ngayon.” Pahayag ni Leachon
Nais din na paimbestigahan sa Senado ni Senator JV Ejercito ang procurement ng gobyerno na dengue vaccine na dengvaxia.
Kasunod ito ng anunsyo ng pharmaceutical company na Sanofi kung saan tinukoy na hindi ito ligtas na ibakuna sa mga taong hindi pa sakit ng dengue.
Ayon kay Ejercito, dapat itong talakayin ng Blue Ribbon Committee at Senate Committee on Health upang alamin kung nagkaroon ng korupsyon at sino ang dapat na papanagutin.
(Balitang Todong Lakas Interview / Ulat ni Cely Bueno)